साधारण राहदानीलार्इ श्रम स्वीकृती नदिइने

जेठ १, काठमाडौं । जेठ १ गतेदेखि मेसिन रिडेवल पासपोर्ट (MRP) भएकाहरुले मात्रै वैदेशिक रोजगारीका लागि श्रम स्वीकृति पाउने भएका छन् । वैदेशिक रोजगार विभागका प्रवक्ता बद्रीकुमार कार्कीका अनुसार बिहीबारदेखि वैदेशिक रोजगारीमा जाने कामदारले हस्तलिखित राहदानीबाट श्रम स्वीकृति पाउने छैनन् ।

 

जेठ १ गते अघिनै भिसा आइसकेकाहरुले भने एमआरपी बनाउन निवेदन दर्ता गरेको रसिदको प्रमाणित प्रतिलिपीसहित निवेदन दिएको अवस्थामा मात्र हस्तलिखित राहदानीबाट श्रम स्वीकृति दिइने उनले जानकारी दिए । त्यस्तै पुनः श्रमस्वीकृतिको हकमा एमआरपीको निवेदन दर्ता गरेको रसिदको प्रमाणित प्रतिलिपी संलग्न राखी निवेदन दिएमा हस्तलिखित राहदानीबाट पुनः श्रमस्वीकृतिका लागि स्वीकृति दिइने प्रवक्ता कार्कीले बताए ।

 

विसं २०७२ मंसिरदेखि हवाइ यात्राका लागि विश्वभर अनिवार्य रुपमा एमआरपी राहदानी लागू गर्ने प्रावधान लागू भएपछि नेपाली कामदारलाई सहज होस् भनेर आफूहरुले जेठ १ देखि श्रमस्वीकृतिका लागि एमआरपी अनिवार्य गर्न लागेको प्रवक्ता कार्कीको भनाइ छ ।